मिथिला रत्न,सिरहा । शुक्रबार जिल्ला प्रहरी कार्यालय सिरहाको आँगन फरक देखिन्थ्यो। साधारण दिनहरूमा अपराध नियन्त्रण र सुरक्षा योजनाबारे छलफल हुने त्यही आँगनमा आज भने सम्मान र भावनाले भरिएको वातावरण थियो। प्रहरी नायब उपरीक्षक (डिएसपी) बीरेन्द्र कुमार पासवानको विदाईमा आएका स्थानीय, समाजसेवी, सञ्चारकर्मी र राजनीतिकर्मीहरूको अनुहारमा मिश्रित भाव देखिन्थ्यो—एकातिर बिछोडको पीडा, अर्कोतिर इमानदार प्रहरी अधिकृतलाई नयाँ जिम्मेवारीमा शुभकामना दिने गर्व।
सिरहाको सुरक्षामा विशेष छाप
प्रहरी मुख्यालयको नियमित सरुवाअन्तर्गत पासवानलाई जनकपुरधाम पठाइएपछि सिरहावासीले उनलाई भव्य रूपमा विदाई गरे। सिरहामा कार्यरत रहँदा उनले लागुऔषध नियन्त्रणदेखि तस्करी रोकथाम, सडक सुरक्षा जनचेतना अभियानदेखि आपराधिक गिरोह नियन्त्रणसम्म नेतृत्वदायी भूमिका निर्वाह गरेका थिए।
स्थानीय सञ्चारकर्मीहरू भन्छन्, “पासवानको कार्यकालमा सामान्य विवाद होस् वा ठूलो अपराध, जनताको पक्षमा उभिने प्रहरी अधिकारीको छवि बनेको छ। सिरहामा उनले प्रहरीप्रतिको विश्वास पुनःस्थापित गर्न सफल भए।”
‘जनताको डिएसपी’ भनेर चिनिने अधिकारी
समाजसेवीहरूले उनलाई ‘जनताको डिएसपी’ भन्न थालेका छन्। कारण स्पष्ट छ—उनी केवल नियम पालना गर्न सीमित रहेनन्, बरु जनतासँग प्रत्यक्ष संवाद र सहकार्यमा विश्वास गर्ने अधिकारीको रूपमा चिनिए। उनका नेतृत्वमा सञ्चालन भएका जनचेतना कार्यक्रमहरूले प्रहरी र जनताबीचको दूरी घटाएको थियो।
राजनीतिकर्मीहरूको भनाइ छ, “उनको सक्रियताले शान्ति–सुरक्षा कायम हुनुका साथै अपराधका जरा फुकाउने काम भयो। इमानदार र निष्पक्ष प्रहरी अधिकारी भनेको कस्तो हुन्छ भन्ने उदाहरण पासवान हुन्।”
विदाई समारोहमा भावनात्मक माहोल
विदाई कार्यक्रममा उपस्थिति जनसमुदायले एक स्वरमा भने—पासवानले देखाएको इमानदारी र सक्रियतालाई उनले जहाँ गए पनि निरन्तरता दिनेछन् भन्ने विश्वास छ। प्रहरी कार्यालयको आँगनमा राखिएको बिदाइ समारोहमा धेरैको आँखामा नमीझरी छल्किएको थियो।
नयाँ जिम्मेवारीतर्फ अघि बढ्दै
अब डिएसपी पासवान जनकपुरधाममा जिम्मेवारी सम्हाल्न गएका छन्। तर सिरहामा उनले छोडेको इमानदार प्रहरी अधिकारी’को छवि, जनताप्रतिको उत्तरदायित्व र अपराधविरुद्धको कठोर प्रतिबद्धता लामो समयसम्म सम्झिरहिनेछ।
सिरहावासीहरूको आशा छ—जनकपुरमा पनि उनले उस्तै सक्रियता देखाउँदै प्रहरी र जनताबीच पुलको काम गर्नेछन्।
